رئيس مجلس الإدارة عفاف رمضان
رئيس التحرير سيد بدري
المدير التنفيذي علي شقران
إشراف عام أسامه حسان

أنا آسف - سعيد شحاتة - سلسلة روائع الإبداع

الاحد 14 يناير 2018 - 1:46 PM |عدد مشاهدات :1862
  صورة ارشيفية
طباعة
رفعت السنوسي

أنا آسف

لأن الورد طارح م الوجايع تين

لأن الضحكه طالعه بخوف

وصوتي ملجمه التانيين

عشان قلبي الحصان مجبر

يقابل في السبق خاينين

ويرمح وسط ناس نايمين

ويعطش م الكلام في العشق

وينهج م الكلام في الدين

أنا آسف

عشان ما اعرفش شايفك فين 

عشان ما اعرفش وقت الزحمه رُحت منين

عشان ما اعرفش شكلك إيه

وليه صوتك كئيب وحزين

عشان ما اعرفش ريحة الفل م الياسمين 

أنا آسف

عشان أنا وانت رغم خرسنا مش ساكتين

ورغم صراخنا مش سامعين

ورغم المشي والأوجاع ما بيبانش إننا ماشيين

ورغم الضحك بنحاول نقف ساعة الأدان صايمين

أنا آسف 

عشان ما اعرفش مين فينا اللي حارب مين

ومين فينا اللي سلّم مين

ومين فينا -اللي رغم الدمّ- داس وقت الوجع على مين

أنا آسف عشان ما أعرفش.. مين فينا اللي ساحب مين

عشان أصبحنا وقت الجد ف اسطبل الحياه اتنين

وقررنا إننا ضدّين

الشاعر سعيد شحاتة

شارك

التعليقات